Uda honetan bada zer egin eta ikusi Oñatin! Naturaz, kulturaz eta bertako jaki goxoenez gozatzeko aukera ezin hobea izango da egun hauetan. Ekintzak eta eskeintzak anitzak dira, orain, zuk zeurea aukeratu besterik ez duzu.
KULTURAZ BLAI UDA HONETAN OÑATIN
Bisita gidatuak Oñatin
Oñatiko turismo bulegoak eta Txokolateixia Interpretazio Guneak bisita gidatuak eskeiniko dituzte uda osoan zehar herriguneko altxorrak ezagutu eta kakaoak Oñatin izan duen garrantzia ezagutzeko.
“Oñatiko Altxorrak” bisita gidatuak uztaileko asteburuetan eta Abuztuan egunero eskeiniko dira, 13:00etan emango zaie hasiera turismo bulegotik. Gogoratu erreserba egitea beharrezkoa izango dela parte hartu ahal izateko! Dei iezaguzu 943783453 zenbakira!
Txokolateixia Interpretazio Gunean Oñatiren aurpegirik gozoena ezagutzeko parada izango da. Kakaoa eta Oñatiren arteko harreman historikoa ezagutzeko aukera egongo da eskainiko dituzten bisitetan, hori bai, erreserbapean! Deitu 605763595 zenbakira.
Bisita-gidatu hauekin batera San Migel errotaren Interpretazio Guneak iraganeko garaiak gogora ekarriko ditu. Errota honetan Oñatiko jauntxo ziren Gebaratarrentzat aleak nola ehotzen ziren ikusteko aukera izango da, turismo bulegora etorri besterik ez duzu egin behar!
Oñati kokatzen deneko natur parajea bakarra da. Erkidegoko tontor garaienetan gailur egin, pagadietan barrena galdu edo mendi hauen bihotz-barrunbeetara sartzearen esperientzia eskeintzen du Oñatik. Denon neurrira eta denon gustura eginikok aukerak aurkituko dituzu bertan.
Bisita-gidatuak Arrikrutz-Oñatiko kobetan
Ekainaren 1etik abuztuaren 31 bitarte, egunero eskeiniko dira bisita gidatuak bertan. Ordubeteko iraupena izan ohi dute eta erreserba egitea beharrezkoa da 943082000 edo arrikrutz@onati.eus helbidean.
Galeria 53ko bisita gidatuez gain ekintza bereziak ere badaude. Famili eta txikiei bideraturiko EspeleoTxiki bisita bereziak , baita, helduei bideraturiko EspeleoArrikrutz bisita bereziak ere. Ekintza hauetan parte hartzea nahiko bazenu ez ahaztu erreserba egitea!
Arantzazuko Santutegian egunero zabalik izango da basilika. Bisita-gidatuak ere izango ditu bertaratzen den bisitariak, erreserbapean noski! Igande eta jai-egunetan autobus zerbitzua izango da Oñati eta Arantzazu artean.
Aurten ere, Donostiako Musika Hamabostaldiak kontzertu bat eskainiko du Arantzazuko Santutegian, Carlos Nuñez-en eskutik joango da aurtengo ekitaldia eta “Celtic Beethoven” lana eskainiko da, bertan, Carlos Nuñezek omenaldi bat eskainiko dio Beethoveni honen jaiotzaren 250. urteurrenean, konpositoreak idatzitako obrak interpretatuz, irlandar, eskoziar edo galestar melodietan oinarrituta. Sarrerak internet bidez eskuragai daude.
Parketxeak ere ateak irekita izango ditu ostiral-igande artean, informazio gehigorako 943782894 zenbakira deitu.
Pottokalekuren eskutik europako zaldi zaharrena den pottoka ezagutzeko aukera izango duzu baita, dei iezaiezu 670274461 zenbakira.
Esku-ltu-ra kultura eskura. Udako kultur programazioa.
Uztailak 7. Maite Larburu. 19.00. Lazarraga lorategia.
Uztailak 18. Urmuga. 19:00. Frontoia.
Uztailak 21. Noa Elvis. 19.00. Lazarraga lorategia.
Uztailak 24. Musika banda. 19:00. Lazarraga lorategia.
Irailak 5. Circo Chosco “Indartsuak” familientzako ikuskizuna. 19.00 Errementari Plaza.
Doan. Aforoa murriztuta egonik sarrerak aldez aurretik eskuratzea beharrezkoa izango da www.oñati.eus helbidean edo Txokolateixia-n.
Bertako gastronomiarik onena aurtengo udan!
Bertako jakirik gozoenak dastatzeko aukera izango da bertako jatetxe eta tabernetan. Baita, Oñatin bertan ekoizten diren produktu gastronomikoak eskuratzeko ere, txokolatea, txakolina eta Idiazabal gazta adibidez. Larunbatero ospatzen den azokan ere herriko produktuak eskuratu ahal izango dituzu!